නැවත ඉපදෙන්න ඔබටත් ඕනෙමද.?

බොහෝ දෙනෙකු අපිට නොපෙනෙන හරියටම නොදන්නා පෙර ආත්මය හෝ පසු ආත්මය පිළිබඳව සිතමින් කනස්සල්ලට පත්වෙති.
ගිය ආත්මයේ කොහේ සිටියාද …?
ලබන ආත්මයේ කොහේ ඉපදේද…..යන්න සිතමින්ම කාලය ගත කරති ….

දන්නවාද මේ ආත්මයේම ඔබට නැවත උපදින්නට අවස්ථාව තිබෙන බව…..

සමහරු තමන්ගේ රූපය සුන්දර නොවේ යැයි සිතමින් ලබන ආත්මයේ වත් සුන්දර රූ සපුවක් ලැබේයැයි අපේක්ෂාවෙන් පෙරුම් පුරති .
එහෙත් ඔබ දන්නවාද….?

මේ ආත්මයේ ඉපදුනු ආකාරයට වඩා සුන්දරව කල්යාමේදී තමාගේ පෙනුම ඉතාමත් සුන්දර බවට පත් කරගෙන සිතා ගන්නටත් බැරි ආකාරයෙන් සුන්දර ජීවිත ගත කරන අය මේ පෘථිවියේ ඕනෑතරම් සිටින බව ……
එසේම තමන් දුප්පතෙක් ඇයි සිතා ලබන ආත්මයේවත් පොහොසත් ආත්මයක් ලැබේවි යැයි සිතමින් පෙරුම් පුරමින් කණගාටු වෙමින් සිටින බොහෝ දෙනෙකු අතරේ තම දිළිඳු ජීවිතය සම්පූර්ණයෙන් වෙනස් කොට ජීවිතය ඉතාමත්ම ජයග්‍රාහී සාර්ථක ධනවත්ම කුලකයට ගෙන ගිය බොහෝ දෙනකු මේ පෘථිවියේ ජීවත් වෙති…..

එසේම ඔබ දන්නවාද තම කටුක දුක්බර ජීවිතය වෙනුවට මීළඟ ආත්මයේ සතුටින් ජීවත් වන්නට පෙරුම් පුරන අය අතරේ තම දුක්ඛදායි ජීවිතය සහමුලින්ම වෙනස් කොට ප්‍රීතිමත් ජීවිතයක් උදාකරගනිමින් තම ජීවිතය සතුටු සාගරයක් බවට පත්කර ගත් බොහෝ අය සිටිති ..

එසේ නම් පෙර හෝ පසු ආත්මය පිළිබඳව සිතමින් කරදරවලින් සිටිනවාට වඩා මේ ආත්මය තුලම ඒ ඔබ ප්‍රාර්ථනා කරන ආත්මය ඔබටම උදාකර ගත හැකි බව ඔබටම වැටහෙනු ඇත ….
ජීවිතයේ මෙවැනි දැවැන්ත ධනාත්මක එසේත් නොමැතිනම් සුබවාදී වෙනස්කමකට තම ජීවිතය හුරු කර ගත් අය සැබැවින්ම ඔවුන්ගේ පෙර ගෙවුණු එම දුක්ඛිත කාලය පෙර ආත්මයක මෙන් සිතා අමතක කොට තම ජීවිතය අලුත් ආත්මයක් වෙත මේ ආත්මයේම ගෙන ගිය අය වෙති..

ඔබ කුමන තරාතිරමක කුමන වයසක කුමන මට්ටමක සිටියත් ජීවිතය ධනාත්මක දැවැන්ත වෙනසකට ගෙන යාමට එය කිසිදු බාධාවක් නොවේ….

සැබැවින්ම ඔබ මුලින්ම මනසින් නැවත උප්පත්තියක් ලැබුවා සේ වෙනස් වීමට උත්සාහයක් නිරන්තරයෙන් අත් නොහැර කරන්නේ නම් ඔබට ද මේ ආත්මය තුලම ඔබ අපේක්ෂා කරන සාර්ථක ජයග්‍රාහී ආත්මය උදාකරගත හැකිවනු ඇත..

ඔබට වෙනස් හෝ අළුත් කරගත හැකි වන්නේ ඔබේ මේ මොහොතේ සිට එළඹෙන ඉදිරි ජීවිතය පමණි…..
එය වෙනස් කරගන්නා ප්‍රමාණය අනුව ඔබට මේ ආත්මයේදීම ඒ ලැබුනේ අළුත් ආත්මයක්ද යන්න පැහැදිලිවනු ඇත.

මානව හැකියා ප්‍රවර්ධන විශේෂඥ ජ්‍යෙෂ්ඨ මනෝවිද්‍යා උපදේශිකා
රත්නා පුෂ්ප කුමාරි